Farg‘ona viloyatining O‘zbekiston tumanida mast holda avtomobil boshqargan haydovchi urib yuborgan YPX katta inspektori vafot etdi. Bu haqda Ichki ishlar vazirligi xabar berdi.
Hodisa 31-iyul kuni soat taxminan 23:30 da O‘zbekiston tumani “O‘qchi” mahallasi hududidan o‘tuvchi 40V064 avtomobil yo‘lining 20-kilometrida sodir bo‘lgan.
1996-yilda tug‘ilgan A.E. mast holda Spark avtomobilini boshqarib ketayotib, tungi xizmatni olib borayotgan Farg‘ona viloyati IIB Jamoat xavfsizligi xizmati YHXB 2-mintaqaviy hudud YPX otryadi 3-safarbar guruhi katta inspektori, serjant Xayitbek Karimjonovning to‘xtash haqidagi qonuniy talabiga bo‘ysunmagan va uni urib yuborgan.
Og‘ir tan jarohatlari olgan YPX xodimi shifoxonaga olib borilgan. Shifokorlar ko‘rsatgan muolajalarga qaramay, u reanimatsiya bo‘limida vafot etgan.
Mazkur holat yuzasidan Jinoyat kodeksining 266-moddasi 2-qismi va 117-moddasi 2-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
Bosh prokuratura ma‘lumotiga ko‘ra, haydovchiga nisbatan qamoqqa olish tarzidagi ehtiyot chorasi qo‘llangan.
Ko`proq xabarlar Telegram kanalimizda
Obuna bo`ling
