2-aprel kuni Toshkentda Visa kompaniyasi hamda Ipak Yo‘li Banki hamkorligida amalga oshirilayotgan global She’s Next tashabbusining birinchi bosqichi rasman start oldi. Loyiha ayol tadbirkorligini rivojlantirish va o‘z biznesini boshlayotgan yoki kengaytirayotgan ayollar uchun barqaror qo‘llab-quvvatlash ekotizimini yaratishga qaratilgan.
Dastur taqdimoti media-brunch formatida o‘tkazildi — norasmiy muhitda OAV vakillari va inflyuenserlar tashabbus, uning imkoniyatlari hamda ishtirok shartlari bilan birinchilar qatorida tanishdilar. Tadbir doirasida, shuningdek, O‘zbekiston Respublikasi Raqamli texnologiyalar vazirligi, Visa, Ipak Yo‘li Banki va HAMROH kompaniyasi o‘rtasida hamkorlik memorandumi imzolandi. Ushbu hujjat tomonlarning mamlakatda ayol tadbirkorligini birgalikda rivojlantirish niyatini mustahkamlaydi.
Imkoniyatlar ekotizimi
She’s Next tashabbusi 2019-yildan buyon global miqyosda rivojlanib kelmoqda va 2021-yildan boshlab Markaziy Osiyoda amalga oshirilmoqda. 2026-yilda ushbu dasturga O‘zbekiston ham qo‘shildi.
Visa’ning Markaziy Osiyo bo‘yicha mintaqaviy menejeri Sanjar Sulaymanovning ta’kidlashicha, kompaniya uchun ayol tadbirkorligini qo‘llab-quvvatlash strategik yo‘nalishlardan biri hisoblanadi:
Ko‘plab iqtisodiyotlarda aynan ayollar biznes o‘sishining drayveriga aylanayotganini ko‘ryapmiz. Shu bois, bunday tashabbuslarni nafaqat global darajada, balki mintaqamizda ham rivojlantirish biz uchun muhim.
Uning so‘zlariga ko‘ra, dastur faqat moliyaviy qo‘llab-quvvatlash bilan cheklanmaydi — u ta’lim bloki, mentorlik va loyihalarning ekspert bahosini ham o‘z ichiga oladi.
Birinchi bosqich Boshlang! shiori ostida o‘tkazilmoqda. Bu asosiy g‘oyani — ayollarga tadbirkorlikdagi eng muhim to‘siqni yengib, birinchi qadamni qo‘yishda yordam berishni ifodalaydi.
Nega ayollarga alohida e’tibor zarur
Raqamli texnologiyalar vazirining maslahatchisi Kamola Sobirova o‘z nutqida shuni ta’kidladi: imkoniyatlar teng bo‘lishiga qaramay, ayollar ko‘pincha o‘quv dasturlari va loyihalarni rivojlantirishning yakuniy bosqichlariga yetib bormaydilar.
Dasturlarimizni tahlil qilganimizda, qizlar ko‘proq yo‘lning o‘rtasida to‘xtab qolayotganini ko‘ramiz. Bu esa ularga qo‘shimcha qo‘llab-quvvatlash — nafaqat bilim, balki ishonch, motivatsiya va yetakchilik ko‘nikmalari ham zarurligini ko‘rsatadi, — dedi Kamola Sobirova.
Shuningdek, u madaniy omillarga ham e’tibor qaratdi: jamiyatda hanuzgacha ayollarning moliyaviy mustaqilligiga nisbatan ayrim to‘siqlar mavjud bo‘lib, bu ularning tadbirkorlikdagi faolligiga ta’sir qiladi.
Shu bilan birga, ayollar salohiyatini rivojlantirish davlat siyosati darajasida qo‘llab-quvvatlanmoqda, qizlarning IT va biznesga qiziqishi esa ortib bormoqda.
Hamkorlar va mahalliy ekotizim roli
Tashabbusning muhim qismi sifatida HAMROH kompaniyasi ishtirok etadi. U ayol tadbirkorlarni birlashtirib, ularga moliyalashtirish va ta’lim imkoniyatlarini taqdim etadi.
Kompaniya rahbari Dilfuza Nurmatova qisqa vaqt ichida 13 mingdan ortiq ayollar qamrab olinganini ta’kidladi:
Biz ishtirokchilar bir-birini qo‘llab-quvvatlaydigan hamjamiyatni shakllantirdik. Bugun esa hamkorlar bilan birgalikda moliya, texnologiya va bilimlarni birlashtiruvchi ekotizimni yaratmoqdamiz.
Dastur qanday tashkil etilgan
Ishtirokchilar uchta yo‘nalishda ariza topshirishlari mumkin:
• Boshlang‘ich biznes;
• Amaldagi biznes;
• IT-biznes.
Dastur bir necha bosqichdan iborat: ro‘yxatdan o‘tish, ta’lim, test sinovlari, biznes-rejalarni ishlab chiqish va topshirish, ekspert baholashi hamda final bosqichi.
Ta’lim qismidan tashqari, grantlar ham ko‘zda tutilgan. Boshlang‘ich biznes yo‘nalishida g‘olibalar $4 000 gacha, amaldagi biznesda $6 000 gacha mablag‘ oladilar, IT yo‘nalishi uchun esa $3 000 miqdorida alohida grant ajratilgan.
Amaliy ahamiyat
She’s Next tashabbusining asosiy e’tibori amaliy foydaga qaratilgan: ishtirokchilar nafaqat moliyaviy yordam, balki biznesni rivojlantirish vositalari, ekspertlardan fikr-mulohazalar va loyihalarni kengaytirish imkoniyatiga ega bo‘ladilar.
Birinchi bosqich uchun ro‘yxatdan o‘tish allaqachon ochiq. Tashkilotchilar ta’kidlashicha, O‘zbekistondagi ayol tadbirkorlar orasida dasturga qiziqish yuqori bo‘lishi kutilmoqda.
Mazkur tashabbusning ishga tushirilishi ayollar nafaqat biznesni boshlashi, balki uni muvaffaqiyatli rivojlantirib, natijaga olib chiqishi mumkin bo‘lgan barqaror muhitni shakllantirish yo‘lida muhim qadam bo‘ldi.