Foto: Instagram
Taniqli bokschi, Rio Olimpiadasi chempioni Fazliddin Gʻoibnazarov 5-yanvar kuni Instagram sahifasiga yelkasida ov quroli, oyoqlari ostida esa oʻnga yaqin qush aks etgan suratlarni hamda ov jarayoni aks etgan video joyladi.
Sportchining mazkur suratlari Instagram kuzatuvchilarining keskin tanqidlariga sabab boʻldi. Koʻplab tarmoq foydalanuvchilari jonzotlarga ozor berish yaxshi emasligini taʼkidlagan boʻlsa, ayrimlar bokschidan bunday xatti-harakatni kutmaganini taʼkidlagan.
Bokschi ushbu holat yuzasidan masʼullar bilan gaplashib olganini aytib, izoh berishni xohlamagan.
“Ertaga baliq ovlasam ham, nega baliq ovladilaring, deb ham hamma gapiradi. Odamlarga qoʻyib bersalaringiz, tirnoq orasidan kir qidiradi, toʻgʻrimi? (Qushlar) Qizil kitobga kiritilmagan-ku. Odamlar gapiraveradi, eʼtibor qilmanglar”, — degan sportchi.
Fazliddin Gʻoibnazarov ishtirokidagi mazkur holatga ekologuz telegram-kanali ham eʼtibor qaratib, sportchilar qushlarni oʻldirishni emas, balki ularni asrash, mehr koʻrsatishni targʻib qilishi kerakligini bildirgan.
Shuningdek, ushbu telegram-kanal Tabiat resurslari vazirligidan sportchi bilan bogʻlanib, holat yuzasidan rasmiy munosabat bildirishlarini soʻragan.
Toshkent viloyati Ekologiya boshqarmasi matbuot xizmati ushbu holatga nisbatan rasmiy munosabat bildirdi.
“Ijtimoiy tarmoqlarda boks boʻyicha Oʻzbekiston terma jamoasi aʼzosi Fazliddin Gʻoibnazarovning ov qilib yurgan holati tasvirga olinib tarqalgan video va fotosuratlar yuzasidan Toshkent viloyati Ekologiya boshqarmasi davlat inspektorlari tomonidan tegishli tartibda oʻrganish ishlari olib borilmoqda. Mazkur holat yuzasidan qoʻshimcha maʼlumot berilishi maʼlum qilinadi”, — deyiladi xabarda.
Tabiat resurslari vazirligi axborot xizmatining maʼlum qilishicha, bugun, 9-yanvar kuni vazirlik masʼullarining Fazliddin Gʻoibnazarov bilan uchrashishi rejalashtirilgan. Holat boʻyicha toʻliq maʼlumot mazkur uchrashuvdan soʻng berilishi taʼkidlandi.
Ayni paytda holat tasvirlangan kadrlar sportchining Instagram sahifasidan oʻchirib tashlangan.
Ko`proq xabarlar Telegram kanalimizda
Obuna bo`ling
