Foto: Repost.uz
“Oʻzgidromet” mamlakatda 2023-yil aprel oyida oʻrtacha havo harorati meʼyor atrofida, baʼzi joylarda oʻrtacha yillik qiymatlardan bir oz koʻp boʻlishi haqida maʼlum qildi. Ushbu oyda yogʻingarchilik kam, baʼzi joylarda meʼyor atrofida boʻlishi kutilmoqda.
Oy quruq va iliq ob-havo bilan boshlanadi. 1-aprel kuni Oʻzbekistonning barcha hududlari boʻyicha havo kam bulutli boʻladi, kunduzgi harorat mart oyining oxirgi kunlari kabi 22–27 daraja atrofida, yaʼni meʼyordan 5–8 darajaga yuqori boʻladi.
2–7-aprel kunlari respublika boʻyicha beqaror ob-havo boʻlishi kutilmoqda, baʼzi joylarda shamol shiddatli kuchayishi bilan qisqa muddatli, momaqaldiroqli yomgʻir yogʻadi. Koʻpincha bahorda boʻlgani kabi yomgʻirning hudud boʻyicha tarqalishi va jadalligi juda rang-barang – yomgʻirning jadalligi oʻrtachagacha boʻladi. Kunduzgi havo harorati yomgʻir paytida 5–7 darajaga pasayadi. Aprel oyining birinchi oʻn kunligi oxirida asosan yogʻingarchiliksiz ob-havo boʻlishi kutilmoqda va havo harorati yana koʻtarila boshlaydi.
“Oʻzgidromet”ning dastlabki prognoziga koʻra, aprel oyining ikkinchi va uchinchi oʻn yilliklarida harorat kechalari 7-12 darajadan 12-17 darajagacha, kunduz kunlari 20-25 darajadan 27-32 darajagacha oʻzgarib turishi kutilmoqda.
Maʼlumot uchun, bahorda va xususan, aprel oyida ob-havo baʼzan juda “kutilmagan hodisalar”ni: sovuq, kuchli yomgʻir, momaqaldiroq paytida tez-tez sodir boʻladigan qasirgʻalar, doʻl olib keladi. Kuchli yomgʻirlar togʻoldi hududlarda halokatli sel-suv toshqinlariga olib kelishi mumkin.
Baland togʻlarda hali ham qor koʻchkisi xavfi saqlanib turadi.
Ko`proq xabarlar Telegram kanalimizda
Obuna bo`ling
