Foto: Ijtimoiy tarmoqlar
Namangan viloyatining Pop tumanida yuk mashinalari yonib ketishi oqibatida uch kishi halok boʻldi. Bu haqda FVV matbuot xizmati xabar bermoqda.
Qayd etilishicha, voqea 15-yanvar kuni soat 16:09 da Namangan viloyati Pop tumanida sodir boʻlgan. Unga koʻra, tumandan oʻtuvchi “Qoʻshminor” MFY hududida ketma-ket harakatlanib ketayotgan uchta MAN yuk mashinasi ishtirokida yoʻl-transport hodisasi sodir boʻlgan.
Oqibatda yuk avtomobillarida yongʻin kelib chiqqan. Birinchi yuk avtomobili yoqilgʻi tashishga moʻljallangan boʻlib, mazut, ikkinchi avtomobilga koʻmir, uchinchi avtomobilga boʻyoq mahsulotlari ortilgan boʻlgan.
Voqea joyiga toʻrtta yongʻin-qutqaruv ekipaji soat 16:30 da yetib borib, yongʻin soat 16:33 da qurshab olingan va soat 17:20 da bartaraf etilgan.
Hodisa oqibatida yuk avtomobillarida boʻlgan uch nafar fuqaro halok boʻlgan.
Hozirda IIB tezkor tergov guruhi tomonidan surishtiruv ishlari olib borilmoqda.
Ko`proq xabarlar Telegram kanalimizda
Obuna bo`ling
