Foto: Telegram
Toshkentdagi “Chilonzor buyum savdo kompleksi” hududidagi savdo rastasi “naves”i qulab tushdi. Bu haqda Toshkent IIBB matbuot xizmati xabar bermoqda.
Qayd etilishicha, 10-yanvar kuni ushbu bozor hududidagi 3-4-ayvonlar yon tomoni va 5-6-ayvonlar orqa tomonida yoʻlaklarda oʻrnatilgan soyabonlar (naves) qor qalin yogʻganligi sababli ogʻirlikni koʻtara olmay egilib tushgan.
Xabarga koʻra, shu hududdagi fuqarolar va tadbirkorlar xavfsizligini taʼminlash maqsadida evakuatsiya qilingan. Ushbu savdo doʻkonlari bozor maʼmuriyati bilan hamkorlikda vaqtincha yopilgan.
Sodir boʻlgan hodisa oqibatida tan jarohati olganlar yoʻq.
Ko`proq xabarlar Telegram kanalimizda
Obuna bo`ling
