Foto: Marca
Repost.uz nashri O'zbekiston va dunyo bo'yicha eng qiziq sport xabarlarini qisqa va tushunarli ko'rinishda bir joyga jamladi.
Garet Beyl futbolchilik faoliyatini yakunladi
Foto: BBC
“Real” va Uels terma jamoasining sobiq hujumchisi Garet Beyl faoliyatini yakunlaganini eʼlon qildi.
33 yoshli uelslik futbolchining soʻnggi klubi Amerikaning “Los-Anjeles” klubi edi.
Shuningdek, Beyl faoliyati davomida “Sautgempton”, “Tottenxem” va “Real” klublarida oʻynagan.
Ispaniya klubi tarkibida u uch marta mamlakat chempionligi, bir marta Ispaniya kubogi va Superkubogini qoʻlga kiritdi, shuningdek, besh marta Chempionlar ligasida gʻolib chiqdi.
Bundan tashqari, u UEFA Superkubogida ikki bor gʻoliblik va toʻrt bor klublar oʻrtasidagi jahon chempioni unvoniga ega.
Beyl Uels terma jamoasi safida 109 ta oʻyinda maydonga tushib, 41 ta gol urdi.
Ronaldu “Al Nassr” safida qachon debyut qilishi maʼlum
Foto: Goal.com
“Al Nassr” safiga borib qoʻshilgan Krishtianu Ronaldu qachon debyut qilishi maʼlum boʻldi.
22-yanvar kuni “Al Nassr” Saudiya Arabistoni chempionati 14-turi doirasida “Al Ittifoq”ga qarshi maydonga tushadi. Bu maʼlumotni jamoa ustozi Rudi Garsiya ham tasdiqladi.
13-turdagi “Al Shabab”ga qarshi bahsni forvard Angliya chempionatidagi diskvalifikatsiyasi sabab oʻtkazib yuboradi.
Mbappe FFF prezidentiga: “Afsonaga bunday xurmatsizlik qilib boʻlmaydi”
Skrinshot
PSJ forvardi Kilian Mbappe Fransiya futbol federatsiyasi rahbari Noel Le Greni tanqid qildi.
Zinedin Zidan Fransiya TJ boshqarishga asosiy nomzod edi, ammo hozirgi murabbiy Didye Desham bilan shartnoma 2026-yil yozigacha uzaytirildi.
FFF rahbari Zidanning terma jamoaga kelish ehtimoli haqidagi mish-mishlar uni qiziqtirmasligi, qolaversa, ular oʻrtasida telefon orqali suhbat boʻlganmi, deya berilgan savolga Le Gre fransuz futboli afsonasi unga qoʻngʻiroq qilsa, goʻshakni koʻtarmasligini aytgan. Mbappe prezidentning ushbu soʻzlariga quyidagicha munosabat bildirdi:
- Zidan – bu Fransiya. Afsonaga bunday xurmatsizlik qilib boʻlmaydi...
Xabib Nurmagomedov MMA industriyasidan butunlay ketdi
Foto: Open source
Nurmagomedov MMA industriyasidan butunlay ketdi.
Yengil vazn toifasida sobiq UFC kamari sohibi Xabib Nurmagomedov MMA industriyasidan butunlay ketdi. U endilikda UFC va boshqa jangchilarga murabbiylik va sekundantlik qilmaydi. Xabibning bunday qarorga kelishiga oilasiga koʻproq eʼtibor berishi kerakligi sabab qilib koʻrsatilgan.
Nodirbek Abdusattorov va Javohir Sindarov Niderlandiyadagi musobaqada qatnashadi
Foto: Olamsport
13-29-yanvar kunlari Niderlandiyaning Veyk-an-Zi shahrida shaxmat boʻyicha “Tata Steel 2023” turniri oʻtkaziladi.
85-marotaba tashkil etilayotgan ushbu musobaqada Javohir Sindarov hamda Nodirbek Abdusattorov ishtirok etadi.
Musobaqa 14 ta turdan iborat boʻladi.
Ko`proq xabarlar Telegram kanalimizda
Obuna bo`ling
