Illyustratsiya
Toshkentda sinfdoshlar oʻrtasida kelib chiqqan janjal pichoqbozlik bilan tugadi. Bu haqda Bosh prokuratura matbuot kotibi Hayot Shamsutdinov xabar berdi.
Joriy yilning 21-fevral kuni soat taxminan 11:20 larda Toshkent viloyati Yangiyoʻl tumanida yashovchi 2006-yilda tugʻilgan M.A. avvalgi oʻqigan maktabi — Chilonzor tumanidagi 162-sonli maktabga baholar tabelini olish maqsadida kelgan.
M.A. sinfdoshlari bilan oʻtirgan vaqtida sinfdoshi 2005-yilda tugʻilgan R.I. M.A.ni tashqariga chiqishini aytgan, chiqqandan soʻng maktabga “nega meni ruxsatimsiz kelasan”, deb zoʻravonlik qilib, unga tarsaki tushirgan.
Shu payt M.A.ning oʻrtogʻi 2005-yilda tugʻilgan S.A. ularni ajratmoqchi boʻlgan vaqtida R.I. uni ham urgan. Shundan soʻng, S.A. yonida boʻlgan pichoq bilan R.I.ning qorin qismiga tan-jarohat yetkazgan. R.I. tan jarohati bilan shifoxonaga yotqizilgan.
Qayd etilishicha, R.I.ga “Qorin old devorini teshib kiruvchi kesilgan-sanchilgan jarohati” tashxisi qo'yilgan.
Mazkur holat boʻyicha S.A.ga nisbatan JKning 104-moddasi (Qasddan badanga ogʻir shikast yetkazish) 2-qismi “l” bandi bilan jinoyat ishi qoʻzgʻatilib, dastlabki tergov harakatlari olib borilmoqda.
Ko`proq xabarlar Telegram kanalimizda
Obuna bo`ling
