4-noyabrdan shimoliy hududlarga nam havo massalari kirib kelishi kutilmoqda, bu hodisa keyingi kunlarda respublikaning barcha hududlariga taʼsir etadi. Bu haqda Oʻzgidromet xabar berdi.
4-noyabrda Qoraqalpogʻiston Respublikasi va Xorazm viloyatida, 5-noyabrdan 7-noyabrgacha Oʻzbekistonning katta qismida yomgʻir yogʻadi, togʻli hududlarda qorga aylanadi. 7-noyabr kuniga kelib, harorat kechalari 6-9 daraja iliqqacha, kunduzgi harorat 12-17 darajagacha pasayishi kutilmoqda.
Keyinchalik oy davomida shimoliy hududlar boʻyicha harorat kechalari 0-5 iliqdan 5-10 daraja sovuqqacha, kunduz kunlari 12-17 daraja iliqdan 0-5 daraja iliqqacha oʻzgarib turishi kutilmoqda.
Janubiy hududlar boʻyicha havo harorati kechalari 5-10 daraja iliqdan 3 daraja sovuq-2 daraja iliqqacha, kunduz kunlari 18-23 daraja iliqdan 7-12 daraja iliqqacha oʻzgarib turadi.
Markaziy va sharqiy viloyatlar boʻyicha harorat kechalari 2-7 daraja iliqdan 3-8 daraja sovuqqacha, kunduz kunlari 15-20 daraja iliqdan 3-8 daraja iliqqacha oʻzgarib turishi kutilmoqda.
Toshkent shahrida 31-oktabrdan 3-noyabrgacha yogʻingarchilik boʻlishi ehtimoli kam, harorat asta-sekin koʻtariladi va 3-noyabrga kelib harorat kechasi 9-11 darajani, kunduzi 23-25 darajani tashkil etadi.
Ko`proq xabarlar Telegram kanalimizda
Obuna bo`ling
