“Manchester Siti” bosh murabbiyi Xosep Gvardiola “Chelsi”ga qarshi oʻyin oldidan matbuot anjumanida ishtirok etdi.
Mutaxassis jamoaga kelib qoʻshilgan uch nafar yangi futbolchilar “Chelsi”ga qarshi oʻyin qaydnomasidan oʻrin olishini aytdi.
“Vitor Reys yosh, uning katta potensiali bor, ammo hali unga vaqt kerak. Abduqodir Husanov esa allaqachon moslashishga ulgurgan, u fransuz ligasida baquvvat va tezkor oʻyinchilarga qarshi oʻynagan. Omar Marmush soʻnggi mashgʻulotimizda qatnashdi va oʻylaymanki, u ham tezda moslashadi”, - dedi Gvardiola.
Murabbiyi ushbu oʻyinda yangi oʻyinchilar yordam berishi mumkinligini taʼkidladi.
“Ular aynan shu maqsadda taklif etilgan. “Chelsi”ga qarshi oʻyin uchun menda faqat bitta markaziy himoyachi bor. Husanovni ham hisoblasak, menda yana bir himoyachi boʻladi, “Bryugge”ga qarshi oʻyingacha esa himoyachilar koʻproq boʻlishi mumkin. Ruben Diash va Doku jarohati sababli yordam bera olmaydi. Oʻyinlarimiz koʻpligini inobatga olgan holda, katta tarkibga ega boʻlish biz uchun muhim”, – deydi ispaniyalik mutaxassis.
Maʼlumot uchun, APL 23-turi doirasidagi “Manchester Siti” – “Chelsi” uchrashuvi 25-yanvar, shanba kuni Toshkent vaqti bilan soat 22:30 da boshlanadi.
Ko`proq xabarlar Telegram kanalimizda
Obuna bo`ling
