Prezidentning “Respublika hududlarini jadal kompleks rivojlantirish uchun tanlab olingan tuman (shahar)larda amaliy chora-tadbirlarni amalga oshirish toʻgʻrisida”gi qarori qabul qilindi. Bu haqda Adliya vazirligi xabar berdi.
Qarorga koʻra, respublika hududlarini jadal kompleks rivojlantirishning asosiy maqsadlari etib 16 ta tuman (shahar)da quyidagilar belgilandi, jumladan:
- sanoat ishlab chiqarishi hajmi oʻrtacha 7–8 foizga, bozor xizmatlari hajmi 15–17 foizga, qishloq xoʻjaligi ishlab chiqarishi hajmi 4–5 foizga barqaror oʻsishini taʼminlash;
- ishsizlik darajasini 4–5 foizga, kambagʻallik darajasini 5–6 foizga pasaytirish, bunda Qoʻngʻirot, Asaka, Gʻallaorol, Denov tumanlari hamda Margʻilon shahrini ishsizlik va kambagʻallikdan xoli hududga aylantirish.
Qarorga asosan, quyidagi loyihalar ishlab chiqiladi, jumladan:
- 2025-yil 1-iyulgacha Tuman (shahar)larni jadal kompleks rivojlantirish dasturlari (Dastur) doirasidagi tuman (shahar)lar markazlarining ishlab chiqilganiga 10 yildan ortiq muddat boʻlgan bosh rejalarini 3 ta toifadagi (renovatsiya, rekonstruksiya va konservatsiya) zonalarga ajratib, soddalashtirilgan tartibda hamda aholi va tadbirkorlar takliflarini inobatga olgan holda yangilangan bosh reja loyihalari;
- Asaka, Gʻijduvon, Gʻallaorol, Xatirchi, Chortoq, Sirdaryo, Denov, Quva, Shovot tumanlari va Yangiyoʻl shahri markazlari va ularga tutash hududlarda aholi va sayyohlarning yashashi, dam olishi va sayr qilishi hamda xizmatlar va boshqa yoʻnalishlarda tadbirkorlik faoliyati uchun qulay sharoitlar yaratishga qaratilgan master reja loyihalari;
- Xatirchi, Quva va Chortoq tumanlarida turizm yoʻnalishidagi master reja loyihalari.
1 hafta muddatda Dastur doirasidagi tuman (shahar) hokimliklarida huquqiy eksperiment tariqasida 2026-yil 1-yanvargacha “Aholi va tadbirkorlar manfaatlariga xizmat qilish” yangicha yondashuvi asosida Loyiha ofisi faoliyati yoʻlga qoʻyiladi.
Ko`proq xabarlar Telegram kanalimizda
Obuna bo`ling
