Shavkat Mirziyoyev 29-mart kuni oliy darajadagi norasmiy uchrashuv oʻtkazish uchun Olmaotaga boradi

Ikki mamlakat delegatsiyalari ishtirokida Oʻzbekiston-Qozogʻiston yaxshi qoʻshnichilikka molik dolzarb masalalar koʻrib chiqiladi

Prezident Shavkat Mirziyoyev Qozogʻiston prezidenti Qasim-Jomart Toqayevning taklifiga binoan 29-mart kuni oliy darajadagi norasmiy uchrashuv oʻtkazish uchun amaliy tashrif bilan Olmaota shahrida boʻladi. Bu haqda Prezident matbuot xizmati xabar berdi.

Ikki mamlakat delegatsiyalari ishtirokida Oʻzbekiston-Qozogʻiston yaxshi qoʻshnichilik, strategik sheriklik va ittifoqchilik munosabatlarini izchil mustahkamlash masalalari hamda xalqaro va mintaqaviy ahamiyatga molik dolzarb masalalar koʻrib chiqiladi.

Savdo, sanoat kooperatsiyasi, transport va logistika, energetika, qishloq va suv xoʻjaligi sohalarida amaliy hamkorlikni kengaytirish hamda faol hududlararo aloqalar va madaniy-gumanitar almashinuvni davom ettirish eʼtibor markazida boʻladi.

Oʻtgan yilning aprel oyi boshida Oʻzbekiston va Qozogʻiston yetakchilarining shunday ikki tomonlama uchrashuvi Xiva shahrida boʻlib oʻtgan edi.

telegramKo`proq xabarlar Telegram kanalimizda Obuna bo`ling