Samarqand shahrida tadbirkorning 1,7 mlrd so‘mlik mulkini talon-toroj qilgan shaxslar fosh etildi, deb xabar berdi Bosh prokuratura huzuridagi Departament.
Maʼlum qilinishicha, “T.G.” MCHJ Samarqand filiali haydovchi-ekspeditorlari F.S. va M.N. o‘zaro til biriktirib, MCHJga tegishli kolbasa va pishloq mahsulotlarini naqd pul va plastik kartalari orqali sotgan. Ular hujjatlarni qalbakilashtirish yo‘li bilan jami 1,7 mlrd so‘mni o‘zlarining shaxsiy ehtiyojlari uchun ishlatib yuborgan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
Ko`proq xabarlar Telegram kanalimizda
Obuna bo`ling
