Ijtimoiy tarmoqlarda Toshkent shahridagi umumtaʼlim maktablaridan birida sil kasalligi aniqlangani haqida xabarlar tarqaldi. Holat yuzasidan Sogʻliqni saqlash vazirligi matbuot xizmati izoh berdi.
Aniqlanishicha, Shayxontohur tumanidagi 59-sonli umumtaʼlim maktabining 11-sinf oʻquvchisi M.S. 2024-yilning 26-dekabrida Toshkent shahar 3-son ftiziatriya dispanseriga murojaat qilgan.
Bemorning opasi M.D.ning soʻzlariga koʻra, singlisi M.S. soʻnggi oylarda tez-tez betob boʻlgan. Davolanish uchun faqat xususiy klinikaga murojaat qilgan. Oxirgi marta LOR-shifokor koʻrigidan keyin 3-son ftiziatriya dispanseriga yuborilgan.
Dispanserda oʻtkazilgan rentgenografiya tekshiruvi natijasida unga “Oʻng oʻpka yuqori boʻlagi yalligʻlangan sili, yemirilish davri, BK +” tashxisi qoʻyilgan va bemor darhol Toshkent shahar bolalar sil kasalliklari shifoxonasiga yotqizilgan.
M.S. bilan uyda muloqotda boʻlgan 6 kishi (2 nafari 6 yoshgacha bolalar) 2024-yil 27-dekabrda 3-son ftiziatriya dispanserida rentgen tekshiruvidan oʻtkazilgan va ularda faol sil kasalligi aniqlanmagan.
Shuningdek, M.S. bilan muloqotda boʻlgan va kasallik yuqtirish xavfi mavjud 59-sonli umumtaʼlim maktabi va bemor qoʻshimcha darsga qatnagan xususiy oʻquv maktabi oʻquvchilari va oʻqituvchilari Sanitariya epidemiologik osoyishtalik va jamoat salomatligi qoʻmitasi Toshkent shahar boshqarmasi nazorati ostida 3-son ftiziatriya dispanserida rentgenografiya va diaskin test tekshiruvlaridan oʻtkazilgan.
Tekshiruvlar davomida 1 nafar oʻquvchi (2008-yilda tugʻilgan A.A., bemor M.S.ning yaqin dugonasi)da “Oʻng oʻpka yuqori boʻlagi oʻchoqli sili” BK abs aniqlanib, u shifoxonaga yotqizilgan.
Shuningdek, 3 nafar oʻquvchi — A.A., R.M. va E.D. va 1 nafar oʻqituvchi B.U.larda kasallikka moyillik aniqlangani sababli profilaktik davo muolajalari boshlangan.
Aniqlangan kamchiliklarlar yuzasidan Sanitariya epidemiologik osoyishtalik va jamoat salomatligi qoʻmitasi Toshkent shahar boshqarmasi tomonidan 59-sonli umumtaʼlim maktabi direktoriga nisbatan maʼmuriy bayonnoma rasmiylashtirilgan.
Bugungi kunda 59-sonli umumtaʼlim maktabida davlat dasturi asosida kapital rekonstruksiya ishlari olib borilayotgani sababli ushbu taʼlim muassasasining boshlangʻich sinf oʻquvchilari 115-umumtaʼlim maktabida, yuqori sinf oʻquvchilari esa tumandagi 82-sonli umumtaʼlim maktabida oʻqishni davom ettirmoqda.
21-yanvarda 82-sonli umumtaʼlim maktabida tegishli zararsizlantirish va dimlash tadbirlari takroriy olib borildi. 22-yanvar kuni esa yalpi tozalash va shamollatish tadbirlari oʻtkazildi.
Shuningdek, 115-sonli umumtaʼlim maktabida ham 23-yanvar kuni tegishli zararsizlantirish va dimlash tadbirlari takroriy tashkil etildi.
Ko`proq xabarlar Telegram kanalimizda
Obuna bo`ling
