Foto: Sanitariya epidemiologiya xizmati
Toshkent shahar Yangihayot tumanida o'tkazilgan tekshiruvda xususiy korxona omborida muddati o'tgan mahsulotlar borligi aniqlandi. Bu haqda Sanitariya epidemiologiya xizmati xabar berdi.
Xabarda aytilishicha, Toshkent shahar Sanitariya-epidemiologik osoyishtalik va jamoat salomatligi boshqarmasi Yangihayot tumani boʻlimi Sanitariya boʻlinmasi xodimlari tomonidan Shokirariq koʻchasida joylashgan “URBAN RETAIL” xususiy korxona omborxonasida saqlanayotgan oziq-ovqat mahsulotlarining saqlanish sharoitlari va yaroqlilik muddatlari boʻyicha oʻrganish ishlari olib borilgan.
Natijada, omborxonada saqlanayotgan 4 tonna atrofidagi turli xil oziq-ovqat mahsulotlarining yaroqlilik muddati tugaganligi aniqlangan.
“Oziq-ovqat mahsulotlarining sifati va xavfsizligi toʻgʻrisida”gi qonunning 17-moddasiga asosan isteʼmoldan olinib, oʻrnatilgan tartibda utilizatsiya qilingan.
Ko`proq xabarlar Telegram kanalimizda
Obuna bo`ling