Foto: Repost.uz
Bosh prokuratura matbuot xizmati “Oʻzbekiston 24” telekanalining “Vaziyat 24” koʻrsatuvida Bosh prokuratura xodimi hujjatlarsiz avtomashina boshqarib kelgani haqida berilgan lavha yuzasidan munosabat bildirdi.
Berilgan lavhaga koʻra, 2022-yil 13-dekabr kuni Chilonzor tumani KXAY – Foziltepa chorrahasida Spark avtomashinasi Toshkent shahar IIBB YHXB inspektorlari tomonidan toʻxtatilib haydovchidan hujjatlar taqdim qilinishi soʻralganida, haydovchi oʻzini Bosh prokuraturaning xodimi sifatida tanishtirib, guvohnoma koʻrsatilgan. Guvohnomani koʻrsatgan vaqtida hujjat xolislar ishtirokida tegishli tartibda rasmiylashtirib olib qoʻyilgani aks ettirilgan.
Mazkur holat Bosh prokuratura tomonidan oʻrganilganida, haydovchi Oʻzbekiston Respublikasi prokuratura organlari tizimida xizmat qilmacligi va u tomonidan taqdim qilingan guvohnoma qalbaki ekanligi aniqlangan.
Ushbu holat boʻyicha Chilonzor tumani prokuraturasi tomonidan Jinoyat kodeksining 228-moddasi 2-qismi “b” bandi va 3-qismi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qoʻzgʻatilib, tergov harakatlari olib borilmoqda.
Bosh prokuraturaning qayd etishicha, mazkur lavhani tayyorlash va maʼlumotlar taqdim qilishga masʼul boʻlgan matbuot xizmati tomonidan holatga toʻliq oydinlik kiritilmasdan, biryoqlama va noxolis taassurot va tushunchalarga sabab boʻladigan maʼlumot taqdim qilingan.
“Bu kabi noxolis maʼlumotlar prokuratura organlari shaʼniga putur yetkazadi hamda jamoatchilikda salbiy fikrlar yuzaga keltiradi. Shu bois, ommaviy axborot vositalariga taqdim qilinadigan maʼlumotlarni haqqoniyligini tekshirib, soʻngra taqdim qilish maqsadga muvofiq”, — deyiladi prokuratura xabarida.
Ko`proq xabarlar Telegram kanalimizda
Obuna bo`ling
