Past Dargʻom tumanidagi Qozoq Nayman mahallasi raisi Ahror Arslonov internetda qimor oʻynayotgani aks etgan suratlar tarqalishi ortidan lavozimidan ozod etildi. Bu haqda "Kun.uz" xabar bermoqda.
Ma'lum qilinishicha, Arslonov 2016-yildan beri Qozoq Nayman mahallasida raislik qilib kelgan. 2022-yilgi saylovlarda ham ushbu lavozimga uning oʻzi tasdiqlangan.
Raisning qimor oʻynayotgani aks etgan suratlar ijtimoiy tarmoqlarda tarqalgach, bu mahalla faollarining noroziligiga sabab boʻlgan va ularning talab-xohishi bilan raisning o'zi ishdan boʻshash toʻgʻrisida ariza yozgan.
Uning oʻrniga ushbu mahalladagi xotin-qizlar faoli vaqtincha rais vazifaga tayinlangani xabar berilgan.
Maʼlumot uchun, Arslonov mahalla raisligiga saylangunga qadar Samarqand viloyati IIB yoʻl harakati xavfsizligi boshqarmasida ishlagan.
Ko`proq xabarlar Telegram kanalimizda
Obuna bo`ling