Foto: Repost.uz
Madaniyat markazlari direktorlari, badiiy rahbar va ijodiy xodimlarining bazaviy tarif stavkalari 2,5 baravarga oshiriladi. Bu haqda Normativ-huquqiy hujjatlar loyihalari muhokamasi portaliga joylashtirilgan "Madaniyat markazlari faoliyatini zamon talablari asosida tubdan takomillashtirishga doir qoʻshimcha chora-tadbirlar toʻgʻrisida"gi qonun loyihasida qayd etilgan.
Qayd etilishicha:
— 2023-yil sentyabrdan boshlab yoshlarning kasbga boʻlgan qiziqishi va qobiliyatini rivojlantirish, ijtimoiy faolligini oshirish boʻsh vaqtlarini mazmunli tashkil etish maqsadida madaniyat markazlarida musiqa ijrochiligi va ashula toʻgaraklarini maxsus oʻquv dasturlari asosida pullik oʻqitish yoʻlga qoʻyiladi;
— oʻquv dasturlarini muvafaqqiyatli yakunlagan bitiruvchilarga belgilangan tartibda namunadagi guvohnoma berish tartibi joriy etiladi;
— madaniyat markazlarida tahsil olayotgan toʻgarak aʼzolari ishtirokida uch bosqichdan iborat – tuman (shahar), viloyat va respublika koʻrik-tanlovlari tashkil etiladi;
— respublika va xalqaro koʻrik-tanlovlarida 1, 2 va 3-oʻrinlarni egallagan toʻgarak ishtirokchilarining toʻgarak rahbarlari tegishligi boʻyicha mehnatga haq toʻlashning eng kam miqdorining 6, 4 va 2 barobari miqdorida budjet mablagʻlari hisobidan bir martalik pul mukofotlari bilan taqdirlanadi;
— aholining kitobxonlik madaniyatini yanada oshirish boʻyicha har bir madaniyat markazida bolalar va kattalar uchun har bir madaniyat markazlarida kutubxonalar tashkil etiladi mos ravishda adabiyotlar va notalar toʻplamlari bilan taʼminlanadi.
Shuningdek, madaniyat markazlari rahbar xodimlarining ijtimoiy himoyasini kuchaytirish, ularning ijodiy mahorati va mehnatini munosib ragʻbatlantirish tizimini yanada takomillashtirish maqsadida:
— 2023-yil 1-apreldan madaniyat markazlari direktor (filial mudiri)lari, badiiy rahbar va badiiy, ijodiy xodimlarining bazaviy tarif stavkalari 2,5 baravarga oshiriladi;
— 2023-yil 1-sentyabrdan madaniyat markazlarida faoliyat koʻrsatib kelayotgan toʻgarak rahbarlari uchun har besh yilda bir marotaba malaka oshirishi hamda belgilangan tartibda attestatsiyadan oʻtkazib, malaka toifalar berish tartibi joriy etiladi. Bunda, toʻgarak rahbarlariga beriladigan malaka toifalari tegishliligi boʻyicha musiqa va sanʼat maktablarining konsertmeysterlariga tenglashtiriladi.
Loyihada qayd etilishicha, 2023-yil 1-oktyabrdan madaniyat markazlarida nomoddiy madaniyat merosning ajralmas qismi hisoblangan milliy maqom va baxshichilik sanʼati yoʻnalishlari yanada rivojlantirish maqsadida ushbu yoʻnalishda har yili kamida 10 nafar toʻgarak ishtirokchisini respublika koʻrik-tanlovlariga tayyorlagan va muvafaqqiyatli ishtirok etib, sovrinli oʻrinlarni egallashini taʼminlagan toʻgarak rahbarlariga budjet mablagʻlari hisobidan bazaviy tarif stavkalarining 25 foizi miqdorida har oylik ustama haqlari toʻlab boriladi.
Shu bilan birga, 2024-yil dekabrga qadar yangicha yondashuvlar asosida madaniyat muassassalari barpo etish orqali aholiga eng yuqori va zamonaviy madaniy xizmat koʻrsatish tizimlarini yaratish yuzasidan Toshkent shahrida barcha qulayliklarga ega boʻlgan “Yangi Oʻzbekiston” madaniyat saroyini “Turkiston” sanʼat saroyining yozgi amfiteatri negizida barpo etiladi.
Qonun loyihasida qayd etilishichan, Toshkent viloyati hokimligi Madaniyat vazirligi bilan birgalikda madaniyat markazlariga oʻquvchi-yoshlarning tizimli tashrifini amalga oshirish va ularni madaniyat va sanʼat muassasalarida samarali tahsil olishlarini tashkil etish maqsadida Toshkent viloyati tajribasi asosida 2023-yilning 1-noyabriga qadar har bir tuman va shaharlardagi bittadan madaniyat markazlarida oʻquvchi-yoshlar uchun bir martalik tekin tamaddi qilish (ovqatlantirish) xizmatini autsorsing shartlari asosida mahalliy budjet mablagʻlari hisobidan amalga oshiriladi
Ko`proq xabarlar Telegram kanalimizda
Obuna bo`ling
